sábado, 25 de enero de 2020

Bagüeste

Bagüeste
Bagüeste ye un lugar de Sarrablo que agora pertenece a o termino municipal de l'Aínsa-Sobrarbe, en l'estrimo más meridional de o qual ye, quasi en a muga con o Semontano.

O Sarrablo historico ye una comarca más ampla de cómo tiende a considerar-se hue. S'estendeba a l'ueste de o tozal d'Asba y a sierra de Sebil, que d'acuerdo con a consideración popular fan de buega con Viello Sobrarbe (Tomás, 1999. P. 19), a o sur de a valleta de Morcat y a de Campodarbe, con auguas que marchan ya a mirar l'Ara enta Sobrarbe, a l'este d'o río Galligo por a valle de Guarguera, y por as faldas d'a sierra de Guara. Incluye por lo tanto partes d'o municipio de Boltanya, l'Aínsa-Sobrarbe, Saminyanigo y Biarche, repartius en tres d'as comarcas actuals: Alto Galligo, Sobrarbe y Semontano de Balbatro.

Ye o Sarrablo una comarca alta, en pleno Prepirineu, dominada por alturas que pasan de mil cinco-cientos metros, con altiplanos y recuestos entre a cota mil y mil docientos an que l'hombre le ha sabiu quitar huebras a o bucho y a penya, y barrancos fondos que se fienden como crepas entre os monts y beben l'augua de fuents numerosas, cristalinas y frías como un maitín laso d'hibierno, cargadas con un calso que sieglo a par d'atro s'ha fecho tarquil amariello sobre tot lo que ha quiesto tocar o elemento. Os hibiernos i son largos y fríos, os veranos de calor, y o clima, a saber qué continental, con más sol y más aires que batan a tierra pero menos plevia ni nieu que la rieguen que n'a pura montanya. 'Nueve meses d'hibierno y tres d'infierno' que ye ixa frase que se diz en Sobrarbe sobre os lugars que son mui altos; pos ixo me'n paíz a yo.

As Bellostas y o paisache sarrablés. Dezaga os tresmils encara blancos de nieu.


Naixen de Sarrablo os ríos Balcetz, Isuala, Alcanadre y Guarga, y lo mesmo que a chent, no tarda guaire que l'abandonan, tanta aspreza, buscando a tierra plana de camín.

N'este paisache s'aposienta Bagüeste, pa yo la frontera zaguera de Sobrarbe, que en lo politico lo menos bien que en ye. Ye alto d'a divisoria d'auguas entre o Balcetz y o barranco Mascún, en un promontorio, batiu por l'aire de Puerto en hibierno y por os vulturnos en o verano. Malo pa tot menos pa aventar a palla... u pa meter un castillo que cosirase as mugas con os moros, antes más.


Pa llegar t'allí, como la mayoría, me'n fue ta Las Bellostas que tiene carretera asfaltada. Dende astí, una pista de tierra puya os dos u tres kilometros con vericuetas que faltan, u bel sendero si tos agana puyar más reuto. Ye una escursioneta maja, no guaire cansada de fer, y poco a poco a mesura que pillas altura se fa de millor implaz por as vistas. Cosa que yo fice y no tenebe que haber fecho fue d'escomenzar tan tarde, a principios de primavera y de tardes, pos luego me quedé sin luz, quan no ye ni larga ni de mucho garriar. Malament pa la tornada, pero bueno.

Situación


O puntón d'o Castillo, sobre Bagüeste.
Bagüeste se troba en alto en un sarrato sobre o curso alto d'o río Balcetz, en a cuentra d'o tozal de Sebil. Ye a 1207 metros d'alto, y remata la población un tozal de cima plana que en dicen o Puntón d'o Castillo. Ixo sí que ye un puesto curioso, pos la montanyeta tiene una corona circular, rodeyada por una espuenda de piedra que de seguro se podeba haber emplegau como defensa natural, y ye perfectament plana por alto, lo que podría revelar una explanación fecha por a mano de l'hombre.

Sacando o puntón d'o Castillo, sobre a resta de Bagüeste sinyorea (y esta sí que tiene una presencia clara) la ilesia de Sant Salvador. O templo ye en una faixa un poquet por debaixo d'o puntón, pero encara en o cabo villa de lugar, por alto d'as casas.

Bordas y corrals en a demba.

A demba de lugar son campos más u menos buenos, que s'ha manteniu sin guaire maleza porque encara hue se i lleva a paixentar os ganaus d'atros lugars. Una ralla de penya vista ye a docientos u trecientos metros por o nor-ueste, y aon que remata i trobamos a ermita de Sant Miguel, que ya habremos visto de puyada dende As Billostas porque tanto a pista como lo camín pasan chusto por o lau d'ella.

Casas 

Casa Nasarre (2013)
Bagüeste yera un lugar de nueve casas: Casa Allué, Bara, Javierre, Martín, Nasarre, Tejedor, Urbán, Úrbez y Villanueva. D'acuerdo con o catastro de 1733 yeran casas infanzonas casa Allué, casa Bara y casa Nasarre.(1)

Conoixó a suya mayor población en 1857, con 124 habitants (1). En 1900 en teneba 58 (2). Quedó despoblau n'a decada de 1960.

A economía local yera de base agraria y o municipio yera duenyo de varios molins de farina en o Balcetz. Le perteneceban os lugars de Sant Póliz y Letosa. O termin ye rico en buchos (ixo ya lo diciba Madoz en 1840), y con a madera d'ixe arbusto se feba cullaras y atros trastes que más tarde se vendeba en Semontano y Tierra Plana. Con esta actividat seguiban estando conoixius os suyos habitants en o sieglo XX, con que bella cosa de tradición sí que debión tener.

Ilesia de Sant Salvador 

Ilesia de S. Salvador (S. XII-XVI).
A ilesia de Bagüeste puestar que sía, encara hue, o suyo monumento más vistero. Ye declarada Bien d'Interés Cultural, con codigo SIPCA 1-INM-HUE-003-907-056.

Ye una ilesia romanica, datable n'o sieglo XII. Tiene una torre campanal quadrada, de dos uellos por o canto norte que mira ta lugar, y d'uno por cada un d'os atros. No le queda campanas. Se veye vanos de ventana zarraus en l'abside y en a base d'a torre. A torre data d'o sieglo XVII.(3)

A nau ye rectangular con una capilleta, segurament anyadida en o sieglo XVII, en o costau ueste. O testero meridional se ye separando a boniquet contra la resta, con filtracions que ya se vieba bien en 2013. Ye quasi seguro que quan l'edificio caiga, principiará por astí.

En l'altar mayor, que ye por adintro de l'abside, i hai una furnacina con una piedra picada concava que representa dos figuras humanas.(3)

L'abadía yera medianil con o testero sud de o conchunto, pero fa anyos que ye espaldada como a resta de casas d'o lugar.

L'arco d'a puerta d'a ilesia ye caito por tierra. Se piensa que porque le sacón a piedra clau. Adebant d'esta puerta i hai un patio chicorrón que yera zarrau con paretz. A portalada yera d'arco, y anque l'estau suyo ye precario lo menos s'aguanta en piet.


Bella foto:

Casas

 



Portal de a ilesia y a portalada con l'arco estorrocau.
Casas en runa.

Abside ilesia.


Coro ilesia.




















Casa Javierre (2013)

Pa qui s'haiga quedau con forniguilla:

*http://lospueblosdeshabitados.blogspot.com/.../bagueste-huesca. Lectura a saber qué interesant.
*Bagüeste - Parroquial de San Salvador. (3)

Bibliografía

*TOMÁS ARIAS, Chabier. El aragonés de Biello Sobrarbe. Instituto de Estudios Altoaragoneses. Uesca, 1999. ISBN 84-8127-095-4

lunes, 19 de agosto de 2019

O Plano (Muro de Roda)

Casa o Plano en marzo de 2014.


O Plano ye unatra más entre as aldeyas chicorronas que en tiempos dependeban de Muro de Roda, ésta más en forma d'un mas que d'aldeya. A casa la podemos trobar en a baixant oriental de o tozal que sinyorea ixa fortaleza, y de fecho o normal ye que pasemos por debant suyo si miramos de puyar dende Tierrantona u dende Aluján ta Muro, pos ye a o canto la pista, quasi mesmo en a plana la Fueva.

A casa no yera qualsiquier cosa: se trata d'un edificio enorme, de planta retangular tirando a quadrada y quatro plantas en altura contando patio y falsa, con una ala que esteriorment pariz que s'adedicaba a servicios ausiliars, conetada con a vivienda, con balconeras corridas en a frontera interior. Pariz tamién que o corral u cort interior yera zarrada con un muro que ara ye espaldau. Os artos y atras malezas fan de mal acercar-se.
 
En 2014 (imachen d'alto) ya faltaba bel trozo de cubiertas y l'estau cheneral yera d'amenaza de ruina. Pero en 2019 m'he trobau que o que fa cinco anyos quedaba d'os tellaus ya campa por os suelos, y que en cayer, ha rancau tamién parte d'os solanars de a nau drecha y o rafe y bella ventana d'a falsa, por o qual que tot o conchunto caiga ye cosa de tiempo.

Casa o Plano en chunio de 2019.
 Lo menos dos bordas son arredol de a casona, tamién en ruina. En 2014 i habeba un gortichón chunto a la casa que pareceba que yera cuidau. Bella olivera, un par d'almendreras y lo que pareceban frutals. L'augua se trayeba dende a pista con una manguera negra que se gosa vier en a primer foto.

Por o demás, a casa ye declarada B.I.C. (cod. SIPCA: INM-HUE-003-113-174) pero a mesma descrición diz que ye "en ruinas y abandono".

Tamién fue parte de Muro de Roda:

  • Arasanz.
  • A Corona.
  • Fumanal.
  • A Lecina.
  • Ministirio.
  • O Montero.
  • Muro de Roda.
  • A Plana.
  • O Pamporciello.
  • Susiat. 

Fiestas:

Como totz os nuclios de Muro de Roda, feban a fiesta pa Sant Bartolomé, o vintiquatro d'agosto, con misa y congregación alto en Muro aon que ye la ilesia de o santo patrón.

Pa qui le quede forniguilla:

* Casa o Plano (SIPCA INM-HUE-003-113-174).

domingo, 7 de abril de 2019

A Corona

A Corona

A Corona ye una d'as aldeyetas que formaban o municipio de Muro de Roda, que en a decada d'os anyos 1960 s'integró en a Fueva. O municipio se caracterizaba por l'austeridat de a mayoría d'os suyos nuclios, entre os quals nomás Muro de Roda y Arasanz teneban más que dos u tres casas. Tenemos o nuclio cerqueta d'o camino que baixa dende Muro de Roda enta a Lecina y Arasanz, sin perda.

O nombre le viene que ni pintau: nos trobamos con a casa que queda en pie y as enrunas d'as atras construccions en una planeta más u menos ampla y redondiada y sin vechetación que, como una terraza, s'estendilla a'l solano entre faixas estretas de a mano d'a sierra de Muro que mira t'a Cinca. Una corona ye ixo tamién: un calvero en l'altura d'un monte, por o qual pienso que o toponimo ye prou descriptivo pa l'emplazamiento que tiene.

Pariz que a Corona tuvo dica diez casa ubiertas en o pasau, con 28 habitants en 1940. Manimenos, en o sieglo XX nomás en teneba tres de casas. C. Laglera escribe que, quan os zaguers vecinos van marchar, se vendión as casas por quatro perras y atros en van quitar os materials millors pa fer-se atras construccions, por o que dos d'as tres casas son espaldadas. Esto no pasó solo en a Corona, sino que a mayoría d'as aldeas qu'heban estau de Muro de Roda son agora en runas por ixa estración de materials.


Casa Cozme en marzo de 2014.

As casas de a Corona yeran: casa Oncins, casa Cozme y casa Lecina. Casa Cozme ye a sola que tos podetz trobar que encara s'aguante por partes. Como tamién les pasaba a os atros lugars de o municipio, en a Corona nunca i va llegar a luz ni l'augua corrient, ni teneba escuela ni medico.

Tamién fue parte de Muro de Roda:

  • Arasanz.
  • Fumanal.
  • A Lecina.
  • Ministirio.
  • O Montero.
  • Muro de Roda.
  • A Plana.
  • O Pamporciello.
  • O Plano.
  • Susiat. 

Fiestas:

Como totz os nuclios de Muro de Roda, feban a fiesta pa Sant Bartolomé, o vintiquatro d'agosto, con misa y congregación alto en Muro aon ye la ilesia de o santo patrón.

Bibliografía:

*LAGLERA, Cristian: Despoblados de Huesca (Tomo 3); Sobrarbe - Somontano. Editorial Pirineo, Uesca, 2015. ISBN 978-84-96972-47-6.

Pa qui le quede forniguilla:

*Cristian Laglera: "La Corona" en o blog Despoblados en Huesca.com.

*Casa Cozme (SIPCA 1-INM-HUE-003-113-310).

miércoles, 3 de abril de 2019

A Plana

 
A Plana.

A Plana ye una aldeyeta de o que fue o municipio de Muro de Roda. Nos trobamos a la envista d'as enrunas quan baixamos dende a Corona de camín ta Arasanz.

Teneba dos casas, bien austeras y no guaire grans, con as suyas construccions auxiliars: bordas, corrals y palleros. I hai tamién una prensa de vino a o canto d'una d'as casas.

A Plana domina una buena envista d'a valle meya d'o río Cinca dende a ladera occidental d'o mont de Muro, una zona muy solana y que debeba vivir sobretot de granos, oliveras y cultivos de secano. Esta baixant d'a sierra tiene más fuents que a que mira t'a Fueva. Manimenos, no i hai garra ríos ni barrancos que s'aguante tot l'anyo. Por as condicions cheograficas y climaticas d'o puesto aon ye, no pienso que tenese regano, u si en teneba debeba ser bel gortichón que se podese regar con o entibo d'una fuent u poco más.

As aldeas de Muro tienen todas o mesmo aire humilde, en contraste con poblacions que no son leixos, como Arasanz, aon que i habeba casas grans y prosperas que espleitarían de seguro atros recursos en a ribera. A Plana, como as suyas chirmanas, nunca va recibir os servicios que agora consideramos indispensables: no le va plegar l'augua ni a luz, no teneba escuela ni una pista, y toda comunicación se teneba que fer troixando por senders de ferradura, que d'ixos sí que n'i hai muitos en a redolada.

Como as atras aldeas que le debeban a existencia a Muro de Roda, va fer parte d'ixe municipio dica que desapareixió. En os anyos 1960, en plena epoca de construcción d'o pantano de Mediano (que cacegaría tot o futuro d'a suya redolada), tot o municipio perdió población de contino y remató por absorver-lo Tierrantona. D'aquella fusión amaneció o municipio actual de a Fueva.

Dende un atro punto d'envista.

Tamién fue parte de Muro de Roda:

  • Arasanz.
  • A Corona.
  • Fumanal.
  • A Lecina.
  • Ministirio.
  • O Montero.
  • Muro de Roda.
  • O Pamporciello.
  • O Plano.
  • Susiat.

Fiestas:

Como totz os nuclios de Muro de Roda, feban a fiesta pa Sant Bartolomé, o vintiquatro d'agosto, con misa y congregación alto en Muro aon que ye la ilesia de o santo patrón.

Pa qui s'haiga quedau con forniguilla:

-Casa 1 (SIPCA 1-INM-HUE-003-113-195).

-Casa 2 (SIPCA 1-INM-HUE-003-113-196).

-La Plana en ''Despoblados en Huesca.com''.

viernes, 7 de febrero de 2014

Berroy

A ilesia parroquial de Berroy

Berroy ye un lugar d'a comarca de Sobrarbe que se troba a metat d'altura en a baixant solana d'a montanya a la qual le da nombre, en a valle de l'Ara, y anque no ye leixos d'atros lugars más prosperos, como Fiscal, se troba en un terreno enfaixonau y de firmes pendients. Se zarró a zaguera casa en os anyos 1960, por o qual a ruina ye gran y cheneralizada.


A ilesia parroquial ye consagrada a Sant Ramón Nonato, patrón de lugar y en honor a qui se feba la Fiesta (31 d'agosto). Anque o templo ye BIC en Aragón, en 2013 se troba en ruina parcial, con tellau espaldato y sinyals de caita inminent de la torre. Se testimonia encara elementos de pintura mural en a nau, en muit mal estau, y aspilleras en a torre campanal que dan treslau d'un uso antigo compartiu entre liturchia y defensa.

Se puya ta Berroy por Lardiés, seguindo un sender. S'ha de parar cuenta porque camín y carreras son plenos de broza, y puestar que no en todas as epocas será practicable o lugar.

Situación 
Unas quantas casas de Berroy

O casar de Berroy se troba en a baixant sud-sudeste d'a punta que en dicen de Berroy, pico Berroy u bella vegada tamién sierra de Berroy, anque isto de sierra... be de pender más d'aon se la mire uno, porque forma de sierra (n'o sentiu de crencha prolargada) no me paiz que en tienga, vista dende a Ribera de l'Ara, y lo menos a yo sí que se m'asemeja más bien a una firme montanya, robusta y feriosa. Puestar tamién porque en o mío caso i puyé campo-atraviesa, y as punchas d'ixos artos y barzas no perdonan. Tot lo que puyas te paez más grande si fas rematar o pellejo como un mapa.

La dita montanya de Berroy ye una d'as que zarran o Sobrepuerto, y con as garras que rematan en l'Ara y en o barranco Forcos. Manimenos, Berroy ye meso en o costau que no ye de Sobrepuerto, mirando ta l'Ara y ta la carretera de Fiscal ta Sabinyanigo que, como sabretz, fa pocos anyos que ye feta.

Si tos fa goi observar, puestar que se tos entrefile que o lugar ha aprofitau l'avantalla d'o terreno pa no haber menester de defender-se con muros pretos, como sí que ha pasau a tantismos atros lugars d'istes montes. Pero si tos fijatz un poquet más, tos alpercataretz a-escape de que la ilesia tiene aspilleras ¡sí sinyor!, d'ixas que serviban ta foter-le tiro (u ballestazo) a qui gosase pasar con o mal implaz d'es paisanos, anque ta ixe punto ya i plegaremos más t'adebant.

Por a resta, ya s'antoja difícil tanto l'hipotetico ataque d'enantes como a simple vida d'ahier: paretons y marguins s'adovinan por doquier, por tot arredol de la población. A vida feta a os escalons, como ye o costumbre d'ixes mundos. O cultivo debeba estar tot u mayoría de secano, y si heba bell regano, no debeba pasar d'un gortichón que se podese regar con una fuent u bell regallo que se'n sacase d'una. (Por cierto, no sabié trobar ni a fuent ni o lavadero, tan regulars en os nuestros lugars). Bell rabanyo' uellas, dretos de pastura en a montanya propia u en atras, y poco más, ye lo que cal imachinar-se que podeban tener os pobres pa ganar-se o pan ("Si o treballo dignifica, a montanya no puestar más digna" deciba uno que yo me sé).

Casas y bordas


Una carrera en Berroy
As casas d'o lugar son más bien esparramacadas, como bien diz Cristian Laglera, sin que s'albire gota d'orden ni planificación. Dos u tres carreras, empedratas, con buena costera la mayoría, aon que s'intercala viviendas con o que fuén (u debión d'estar, porque la ruina ye tal que no tot s'adivina) bordas, eras y bell corral.

Anque a ruina ye cheneral, as viviendas en piet fan pensar en una construcción relativament recient: patio con quadra y/u reposte en a planta de carrera, vivienda en a d'alto, muitas con balcón y ventanas amplas y bien distribuidas. Un par d'ellas, que son espaldadas y por ixo ubiertas en canal, deixan entreveyer una estructura de plantas espaciosas con cambras bien deseparadas con tabiques, achustadas con a moda d'os sieglos XIX y XX. Manimenos, bella atra construcción que aparenta estar secundaria (y digo secundaria porque paiz que s'heba emplegau como pallero u como quadra en os zaguers tiempos) tiene estructuras curiosas: un voladero que brinca ta fuera' la frontera -y que a yo me fa pensar en o cul saliente d'un antigo fogaril-, ventanetas chiquininas y mesas a diferents alturas, ixa puerta por a que cal pasar esquinazau... ¿Qui construye asinas una borda? Puestar que a respuesta sía que no siempre ha estau una borda, sino que me fa pensar en as casas medievals que por eixemplo describen Bernad Rivera y Castellanos Oñate ( "Pueblos deshabitados del Alto Aragón", Col. Ofi. Arquitectos de Aragón, 1982); casas pubrismas fetas a las modas medievals (una sola  y diminuta cambra pa vida; comer, dormir y cocinar, en a planta d'alto d'a quadra aon se teneba o ganau, fogaril en a paret d'a vivienda -o fogaril central diz que yera cosa de ricos-), unas viviendas de midas que huei nos resultarían ridiculas, y que en as aldeyas de Sobrarbe y atras zonas montanyesas paiz que perdurón dica o XVI u XVII.


Saqueyau l'arco d'a puerta d'un patio. Casa con balcón.
O cul saliente d'un fogaril? En una buerda?





















(A localidat ya ha estau saqueyada, cal avisar-le-ne a os espabilaus. No tos esperetz cosa de valor, rapinyaires, porque mesmo os borguils de as puertas han volau. Si i queretz puyar, puyat-zos con respeto.)

A ilesia

A parroquial de Sant Ramón Nonato, patrón d'ilesia, lugar y fiesta (31 d'agosto).
 A ilesia que trobamos en o cabo lugar ye la parroquial. As barzas y os artos son tantos que tampoco m'atrevié a mirar más, por o que no sé si en i ha garra templo más. O tellau ye espaldato pa dentro y as toneladas d'enruna ocupan buena cosa d'o interior, tot fendo más dificil mover-se. A cabecera ye fendida de grans brechas, o que ye una menaza de caita inminent pa la torre-campanal.



Se trata d'un templo d'estilo "rustico y funcional", que data d'o sieglo XVI; ya sabetz, ixe estilo que no en ye, y que en realidat s'explica por a no evolución d'as tecnicas constructivas en as zonas rurals dende os primers sieglos medievals (Romanico) dica os primers d'a Edat Moderna. Arcadas de medio punto y vuelta de canyón en tot lo periodo, muit pocas en ojiva u sisquiera apuntadas. Un estilo feto por o pueblo y pa lo pueblo, enradigau en a propia experiencia, a poca diversidat d'as construccions locals, y falto de mayestros foranos que traísen os nuevos estilos (Gotico luego, y Renaiximiento dimpués) dende as villas y ciudatz de tierra plana (más que pa contadas ocasions, que prou que sí, pocas pero en i hay).

Campanal
A ilesia ye un edificio sobrio, exento, situau en o cabo-villa por aon que s'arriba ta lugar. Isto no ye mica' tontería: por a faixa u era que i ha adebant de la ilesia ye según paiz por aon que pasaba o camino de Lardiés y, por tanto, ye por aon s'entraba y se saliba de lugar, pa qualsiquiera que i querese arribar dende a Ribera de Fiscal. Isto nos apunta la important función defensiva3 que tamién debió tener o templo, especialment si paramos cuenta con que en aquells sieglos baixo-medievals un rabanyo' bandoleros y quadrillas de lacayos de sinyors enfrentaus perjoliaban por ixes mundos4 5, y la vida podeba no valer ni un sacre.


Efectivament, veyemos unas quantas aspilleras en a torre, que por o demás s'asemeja prou a qualsiquier atra d'as torres fortificadas d'ilesias que tenemos en Sobrarbe. O campanal teneba dos vanos pa campanas, pero ya en a mía visita de 2013 uno s'heba espaldau. Chusto debaixo d'a torre i ha una casa, que entendemos que podría estar l'abadía. Ye de dar que, con o riesgo de caita que teneba la torre, ista construcción será la primer victima.

A cabecera d'a ilesia ye triple, con un modesto pero singular arco ojival en a capilleta norte que debió d'estar a-saber-lo pincho en tiempos. A capilleta sud ye falsa, y a sagristía se troba en os baixos de a torre-campanal anexa, accesible por una puerta ubierta en a capilla central. Me paiz recordar que a pila baltismera se troba en una capilla lateral, canto montanya, en a nau central, chusto en o que estaría adebant d'a puerta, pero a cantidat d'estorrocos amontinaus en o interior d'o templo fa inseguro pingoniar y no i baixé.

A pesar de l'estau cheneral d'a ilesia, se vei trazas d'as pinturas murals en a cabecera y interior d'os arcos d'as capillas. Parecen motivos cheometricos y florals, d'epoca que no sé.

Pinturas murals.


Capilla mayor
Pila baltismera.





















Historia

 Tenemos constancia d'o toponimo Berroy dende l'anyo 992. En a Edat Meya se documenta como Berroy, Berroi, Borroy y Beroy 6. En 1378 se conoix un infanzón con casal en Berroy, D. Domingo Ximénez de Berroy, que d'acuerdo con Jesús Cardiel podría estar l'antepasau d'os que s'apellidan Berroy más tarde 7.

En o "Diccionario estadístico e histórico de los pueblos de España" de Pascual Madoz nos diz de Berroy que en 1842 teneba 7 casas, con 28 almas y a ilesia parroquial, servida con mosén y sacristán mantenius a vecinal. Que se troba exposau a os vientos, con camins malos, anque o clima ye saludable y recibe o correu dende Boltanya.

A economía local ye agraria, y o terreno, escaso y malo, no rinde guaire. De 38 cahizadas en son mesas en cultura 28. 2 cafizadas son de selva y una de matullar. A resta son pa pastura de ganaus lanars. No i heba cultivos de regano 6. Produce trigo, centeno, hordio, cebada y millo, y ixa anyada tributó 2231 Reals a la Corona.

Curiosament, en o mesmo anyo 1842 (que fue l'anyo d'o dito censo d'a Matricula Catastral), Berroy amanece con 111 habitants de dreto repartius en 15 fogars 9. A partir d'o censo siguient (1857) o municipio de Berroy desaparece, y queda integrau en Fiscal.


Pa qui le quede forniguilla:

 

-BERNAD RIVERA, P.M y CASTELLANOS OÑATE, J.M. "Pueblos deshabitados del Alto Aragón". Zaragoza, 1982.

-LAGLERA, C. Berroy. Despoblados en Huesca. 

-PASCUAL MADOZ. Diccionario estadístico e histórico de los pueblos de España.

-SALAS AUSÉNS, J.A. - Bandolerismo en Aragón en el siglo XVI.



viernes, 8 de noviembre de 2013

Ceresuela

Ceresuela a la envista de la pista de Buerba.

Ceresuela ye un lugar en a valle de Vio ('vallivio'), en a zona central de Sobrarbe, que se troba en a baixant oriental d'o tozal d'a Rayuela, arredol d'es 1280 metros sobre o nibel d'a mar, por alto d'o curso alto d'o río Yesa. Fa parte d'o municipio de Fanlo, y ye despoblau dende os anyos 1960.


Ye comunicau con Yeba por camín de ferradura, que esnaviesa por selvas bien majas, dau que a vegetación d'esta parte de paco de la montanya ye bien zarrada, y tos lievará a trescruzar bell puente tradicional (nomás en i heba 2 que cruzasen a Yesa; uno de piedra, o que pasa o camino de Yeba ta Buerba y l'atro, de fustes bien recios anque son aquerazaus y no m'agosaría a pasar-lo, que ye o que meteba en comunicación Yeba y Ceresuela). O barranco -a Yesa ye un río, pero no sé si a ixas alturas se'n puede encara decir asinas- ye raso y si no pasatz por o puent podretz vadiar-lo por as penyas sin guaire problema. A Yesa ye o río que s'aboca en o Bellós en Puyarruego, pero no sé si totz saben d'aon viene. Tamién tiene pista con Buerba; si ditz a piet mentaliza-tos porque fa una vuelta bien buena y tos sacará tiempo. Atros camins tradicionals de seguro que en i heba, pero no en quedará ni o bayo, o sea que no tos recomiendo mirar de seguir-los.

Os arredols de Ceresuela son plenos de selva de caducifolios.


Qué decir d'ixes paisajes? Yo i fue en primerías de noviembre y tot fa goyo de veyer: i hai fabos, albernices, alameras aon que o monte se fa pocino... con que tot ye color en l'otoño: amarillo, royo... Artos tamién en i heba, pero pocos, por o que o monte ye amable y mesmo si tos metetz a alcurzar no tomaretz mal por punchas. A l'arto y a la gabardera paiz que no les fa goyo os pocinos, más s'estiman as solanas u lo menos, o monte más seco.

Una atra cosa debeba estar vivir en Ceresuela. Por ixas mesmas razons ye d'ixes lugars d'os quals no culpas a nenguno por marchar-se: poco sol, a-saber l'altura... qué nevazos debeban tener que soportar y quántos días debeban pasar dica que s'esbandiba aquello... No sé si lo sabetz pero en a valle d'a Cinca de Sobrarbe i hai una mazada que diz Por Fanlo, nueve meses d'hibierno y tres d'infierno. Pos asinas se m'entrefila que debeban pasar-lo.



Mal terreno tamién, anque i haiga augua. Dende leixos se columbra una escalereta de faixas que yeran a suya tierra de labor, pero poco regano y sin ribera. Como en tantos lugars d'estas comarcas, tot se feba a fuerza de brazo, de garra y d'escamallo. Tampoco tiene Ceresuela las estivas que teneban os de Nerín y Fanlo, u de Puértolas y Bestué, que podeban vivir millor gracias a os rabanyos de uellas que se feban meyo sueltas en a montanya a metat de l'anyo. Estes no: estes a doblar o esquinazo, y a esportar o fruto d'a suya sangre en forma de fillos, enta la emigración. A marchar pastors a'l servicio d'otri, a achustar-se de picadors u pa barranquiar a madera por os ríos pa os maderistas de Puyarruego, la Espunya u Escalona. Como podesen. Mala valle la de Vio, muy maja agora, pero mala quan se dependeba de la tierra pa vivir.



Ilesia

A ilesia de Sant Pedro de Ceresuela. L'arbolet de follas royas ye una ceresera!
A ilesia ye consagrada a Sant Pedro ('Sant Pietro' podría haber estau, si paramos cuenta d'un toponimo de a redolada). Ye BIC declarada, con codigo SIPCA 1-INM-HUE-003-107-017.

(Disquisición lingüistica: en aragonés tenemos dos formas bien documentadas d'o nombre 'Pedro': Pietro, que me'n paiz y si no m'entivoco que se documenta nomás que en a valle de Vio, y Pero, que nos trobamos historicament y estensa en as advocacions d'es Semontanos y dende a Fueva dica la valle de l'Ebro. Tampoco diz nenguno que Pedro no sía aragonés, por cierto.)

O templo ye un edificio simple, austero, debantau en o sieglo XVI y enamplau luego, en o sieglo XVII. A ilesia consta d'una sola nau que yera segmentada con un arco central. A cubierta fa anyos que ye caita.

A dentrada yera lateral, con suportal esterior y s'accedeba enta un baptisterio de lo qual no n'ha quedau ni la pila baltismera (podemos pensar en saqueo de despoblaus). A l'arco d'a puerta, de piedras talladas en fino, le falta la clau, posiblement rancada por o blasón con emblema de Sant Pedro que teneba tallau, con l'anagrama SPOPN - TIBI DABO CLAVES REGNI CELORUM ("Te daré as claus d'o Reino d'es Cielos"), tan ligau con l'hachiografía d'o santo.

As venas d'a ceresera. 
Como tamién a d'a nau, a cubierta d'o baptisterio son enrunas por o suelo, pero a diferencia d'aquélla se'n adevina as trazas porque n'ha quedau as cantonadas encara apegadas a os muros; isto nos fa devinar una cubierta de toscas que puestar que fese una vuelta con nervaduras. Por o forato d'o lenau penden as radices d'un árbol que creixe entre o que queda d'ixe y o campanal. No ye una especie d'as que de regular colonizan os tellaus de lenastras d'esta comarca; a casualidat ha quiesto que sía una ceresera la que ha aduyau a espaldar o principal monumento de Ceresuela, radendo con as venas en as piedras.

A nau principal se dividiba en dos segmentos, deseparaus por un arco que o sino ha quiesto que siga astí. Igual como lo baptisterio, os dos trampos d'a nau debeban estar cubiertos con vuelta de crucería  feita con tosca.

A torre de campanas s'alza tres alturas y, dau lo estato cheneral d'a ilesia, ye a parte más reconoixible y millor conservada, pos contina en piet. Ye una construcción popular, de piedra picada anque solida, con alazetz en una vuelta de canyón que coincide con o espacio de baptisterio, d'o qual ya tos n'he charrau.

O campanal tiene dos vanos simetricos, alargaus y altizos, remataus con vuelta de meyo punto por alto, en cada un d'os costaus d'a torre. En a frontera Sur, Este y Ueste tiene una aspillera en cada un en a primer planta por alto de lenau. O lenau d'a torre se sustenta sobre una bastida de madera.

Historia

En o Diccionario de Pascual Madoz (1848) se diz de Ceresuela que ye lugar con Concello. Seguntes a pachina web de l'INE, o municipio amaneixe como CERESOLA en o censo de 1842, pa desapareixer dimpuesas en o periodo d'a "Gran Extinción" de municipios espanyoles d'antes de 1857, momento a partir d'o qual quedaría ya pa cutio fusionau con Fanlo.

Madoz aporta atros datos, como que ye en a diocesi De Jaca (sic), que tiene una ilesia dedicada a Santa María de la Asunción, y que ye en as garras d'una sierra que se diz 'Bayllara' (sic). Esto ha de fer pensar que a dentrada en o diccionario de Madoz ye entivocada y en realidat se refiere a Cerésola, de la valle de la Guarguera, en Saminyanigo, que ixa sí que ye a los pietz de la sierra que en dicen de Ballarán. Cal parar cuenta que a par d'alavetz os dos lugars se deciban quasi igual, y puestar que los escribise igual: Ceresola y Cerésola.

Fotos 

Año 1870

Torre campanal, con a ceresera en o huembro.
Portalada d'a ilesia. Se i puede vier como son rancadasas piedras centrals de l'arco d'a puerta.

Interior d'a ilesia.
Casas.

Detalle interior de la ilesia.



Pa qui le quede forniguilla

-MADOZ, PASCUAL, Diccionario geográfico estadístico de España y sus posesiones de ultramar.



-Iglesia de San Pedro, Ceresuela, Fanlo, Sobrarbe, Huesca.